Dy të rinj nga Drenica kanë arritur të realizojnë një histori frymëzuese suksesi në një prej vendeve më të njohura në botë – në San Marco të Venecias. Bëhet fjalë për Sokol Osmanin nga Prekazi i Epërm (Skenderaj) dhe Durim Kukiqin nga Tersteniku (Drenas), të cilët sot drejtojnë biznesin e tyre në sektorin e gastronomisë.
Rrugëtimi i tyre nisi vite më parë, kur emigruan në Itali në kërkim të një jete më të mirë. Si të mitur, ata u sistemuan në një strehimore të mbështetur nga autoritetet italiane dhe Kisha, ku gjetën përkujdesje dhe mbështetje për të ndërtuar të ardhmen e tyre.
Me përkushtim, disiplinë dhe respekt për rregullat, fituan besimin e stafit dhe më pas, me arritjen e moshës madhore, siguruan leje qëndrimi dhe të drejtë pune. Fillimisht punuan në restorante të ndryshme, ku fituan përvojë të vlefshme në gastronomi.
Si të rinj ambiciozë, ata u integruan shpejt në shoqërinë italiane, mësuan gjuhë të huaja dhe krijuan komunikim të shkëlqyer me turistë nga e gjithë bota.
Ëndrra e tyre ishte të kishin një ditë restorantin e vet – dhe sot kjo ëndërr është bërë realitet. Në zemër të Venecias, në zonën turistike të San Marco, restoranti i tyre mirëpret vizitorë të shumtë që shijojnë gatimet e tyre të veçanta dhe cilësore.
Ky sukses është dëshmi se me punë, përkushtim dhe vullnet, çdo ëndërr mund të bëhet realitet.
Sokolit dhe Durimit u urojmë shumë suksese dhe mbarësi në rrugëtimin e tyre!
